सुकसिंह के जूनियर नेशनल खो-खो प्रतियोगिता म चयन

कवर्धा । हुनर कखरो मोहताज नइ रहय। अगर मेहनत सच्ची अउ लगन हो तव मंजिल कदम चूमथे। अइसने ही एक मामला प्रकाश म अइस हे। कबीरधाम जिला के आखरी छोर म बसे शत प्रतिशत बैगा बाहुल्य गांव आमापानी के सुकसिंह मेरावी पिता सिरधु सिंह जाति बैगा ह जूनियर नेशनल खो खो प्रतियोगिता थोबाल मणिपुर बर चयन करे गेहे। उँखर जूनियर नेशनल खो खो टीम म चयन होय ले क्षेत्र म खुशी के लहर हे। सुकसिंह के कोच सहदेव राम लेड़िया ह बताइस कि पुलिस अधीक्षक डॉ लाल उमेद सिंह के मार्गदर्शन म बेमेतरा जिला म छत्तीसगढ़ राज्य ले 11 जूनियर नेशनल खो खो खिलाड़ी मन के चयन करे गिस हे। जे मा कबीरधाम जिला के सुदूर वनांचल आमापानी के बैगा युवक के चयन होय हो। जेखर सेती क्षेत्र म खुशी के लहर हे । बताए जात हे कि जूनियर नेशनल खो खो टूर्नामेंट के आयोजन 26 मार्च ले 30 मार्च 2018 तक मणिपुर(थोबाल) म आयोजित करे गेहे। जेमा सुकसिंह ह परदेश के जूनियर नेशनल खो खो टीम के तरफ ले खेलही। गांव के सरपंच प्रतिनिधि छोटेलाल मरकाम,कोच सहदेव लेड़िया,पिता सिरधु सिंह बैगा,सचिव शंकर अनंत, संकुल प्रभारी अनिल पांडे ,प्रेमसिंह नायक,झनक सिंह,टिर्रु सिंह,शिक्षक एस के नेताम के संग गांव वाले मन ह खुशी जताइस हे।