सुब्रत साहू ल छोड़े ल पड़ही स्वास्थ्य विभाग..

रायपुर। मुख्य निर्वाचन पदाधिकारी अउ स्वास्थ्य विभाग म प्रमुख सचिव सुब्रत साहू ल अब एक ठन जगह म कारय करना पड़ही। चुनाव आयोग ह छत्तीसगढ़ सरकार ल कहिस कि वोह अब सुब्रत साहू ल दू छन विभाग म कारय करे के अनुमति नइ दे सकय। एखर पहिलि भी सरकार ह केन्द्रीय चुनाव आयोग ल पत्र लिखके प्रमुख सचिव सुब्रत साहू ल एक्सटेंशन दिलवा चुके हे। करीब एक साल पहिली सुब्रत साहू ल चुनाव आयोग के कमान सौंपेगे रिहिस हे। तब ले वो ह चुनाव आयोग अउ स्वास्थ्य विभाग दूनों के काम संभालत हे। सरकार ह केन्द्रीय चुनाव आयोग ले कहे रिहिस कि उँखर पास आईएएस के कमी हे, एखर सेती सुब्रत साहू ल दूनों जगह म कारय करे के अनुमति प्रदान करे जाए। सरकार अब तक दू बार आयोग म आवेदन लगा चुके हे। विधानसभा चुनाव करीब आठ महीना बाद होवइया हे।अइसे मे चुनाव आयोग के जुम्मेदारी बढ़ जाथे। एखर सेती चुनाव आयोग सरकार ल अउ समय नइ दे सकय। आयोग ह सरकार ल मार्च तक समय देय हवय कि वो ह अधिकारी के व्यवस्था कर ले, ताकि प्रमुख सचिव सुब्रत साहू ल केवल चुनाव आयोग के प्रभार दिए जा सकय।