स्वतंत्रता संग्राम सेनानी वीर बुद्धु भगत जयंती म सामिल होइस साय

बलरामपुर । राष्ट्रीय अनुसूचित जनजाति आयोग के अध्यक्ष नन्दकुमार साय आज बलरामपुर-रामानुजगंज जिला म आदिवासी राजी पड़हा सेवा आश्रम वीर भूमि सरना शक्तिपीठ म आयोजित स्वतंत्रता संग्राम सेनानी अमर शहीद वीर बुद्धु भगत जयंती म सामिल होइन। श्री साय ह आदिवासी राजी पड़हा सेवा आश्रम वीर भूमि सरना शक्तिपीठ म पड़हा समाज के नेता बाबा भीखराम भगत के प्रतिमा के अनावरण घलो करिन।
परसापानी आदिवासी राजी पड़हा सेवा आश्रम वीर भूमि सरना शक्तिपीठ म आयोजित कार्यक्रम म केन्द्रीय अनुसूचित जनजाति के अध्यक्ष नन्दकुमार साय ह अमर शहीद वीर बुद्धु भगत कोति ले अंग्रेज मन के विरूद्ध करे गए लड़ाई के विस्तार ले जानकारी दीन संगेच बहुत अकन आदिवासी महापुरूष मन के बारे म बताइन। उमन कहिन कि देश भर म अनुसूचित जनजाति वर्ग के विरूद्ध होवइया अत्याचार मन ल आयोग कोति ले निराकरण करे जात हे। उमन समाज के उत्थान बर प्राथमिक शिक्षा ल मजबूत करे ल कहिन जेखर से लइका आगू के बढ़ाई कर सकंय। कार्यक्रम म जिला पंचायत सदस्य श्रीमती शशिकला भगत, नगर निगम अम्बिकापुर के पहिली महापौर प्रबोध मिंज, उरांव समाज के पदाधिकारी संग बड़ी संख्या म समाज के मनखे उपस्थित रहिन।