corona : छुरिया ब्लॉक म फेर मिले हे कोरोना के 10 नवा मरीज, जिला म अब 21 संक्रमित

जय जोहार…. राजनांदगांव जिला के छुरिया ब्लॉक के आमगांव म 10 कोरोना (corona) संक्रमित मरीज मिले हे। अब जिला म कोरोना (corona) के सक्रिय मरीज मन के संख्या ह बाढ़ के 21 पहुंच गे हे। बतावत जात हे कि ए सब्बो ह प्रवासी मजदूर रहिस, जेन ह महाराष्ट्र अऊ सूरत ले वापस लहुटे रहिस। जेखर बाद ए मन ल गांव के क्वारेंटाइन सेंटर म रखे गे रहिस।

कुछु दिन पहले 21 लोगन मन के सैम्पल ल कोरोना (corona) जांच बर भेजे गे रहिस, जेमा ले 10 के रिपोर्ट ह आज पाजिटिव आय हे। एखर उम्र 35 ले 40 वर्ष के बीच बताय जात हे। सब्बो ल पेंड्री स्थित मेडिकल कालेज म शिफ्ट करे जाही। ए जानकारी के कलेक्टर जयप्रकाश मौर्य ह पुष्टि करे हे।