Corona: प्रदेश म दिनभर म सामने आय हे कोरोना के 100 नवा मरीज, 107 मरीज मन होइस डिस्चार्ज

जय जोहार…. प्रदेश म कोरोना (corona) संक्रमित मरीज मन के संख्या ह सरलघा बाढ़त जावत हे। प्रदेश म बुधवार रात के कोरोना के 35 नवा मरीज के पुष्टि होय हे।
आज जेन 35 कोरोना (corona) के नवा मरीज मिले हे, ओमा ले बिलासपुर ले 22, रायपुर ले 7, बेमेतरा ले 4 अउ राजनांदगांव ले 2 मरीज शामिल हे। एखर पहिली शाम के 65 नवा कोरोना संक्रमित मिले रिहिस।

जेमा रायपुर ले 13, जगदलपुर ले 12, नारायणपुर ले 10, राजनांदगांव ले 8, दुर्ग ले 5, दंतेवाड़ा ले 4, कोरबा ले 3, बेमेतरा, सरगुजा, कोरिया ले 2-2, बालोद, गरियाबंद, सुकमा, कांकेर ले एक-एक मरीज मिले हे।

उहचे 107 मरीज मन ल स्वस्थ होय के बाद डिस्चार्ज कर दे गे हे।
बता देन कि प्रदेश म कोरोना (corona) के कुल संक्रमित मन के संख्या ह 3526 पहुंच गे हे। जेमा ले सक्रिय मरीज मन के संख्या ह 677 हो गे हे।

ऊहचे 2835 मरीज मन ह स्वस्थ होय के बाद अपन घर लहुट चुके हे। ए वायरस ले प्रदेश म 14 लोगन मन के जान चले गे हे।