सराब दुकान म कर्मचारी मन करत हे कोचियई

रायपुर। भाटापारा के सराब दुकान के कर्मचारी मन सरकार के नियम ल ताक म रखके सराब बेचे के काम करत हे। क्षेत्र के सिद्ध बाबा स्थित अंग्रेजी सराब के दुकान म कर्मचारी मन सराब के ग्राहक मन के भीड़ के फायदा उठाके 130 रुपए के सराब 140 रुपिया म बेचे जात हे। ये बात के सिकायत लेके जब लोगन मन आबकारी बिभाग के दफ्तर पहुंचिस त उहां ताला लगे मिलिस। अऊ चउकाए वाला बात ये हे कि सरकारी दफ्तर म न तो बिभाग के कउनो बोर्ड लगे रहिस अऊ न ही सिकायत करे बर कउनो नंबर दे गए रहिस। आप मन ल बता दन कि आबकारी बिभाग के नियम हे कि एक ब्यक्ति ल अधिकतम 16 पव्वा ही सराब दे जा सकत हे। फेर सुरखी गांव स्थित सराब दुकान म एक युवक ल 38 पव्वा सराब दे गिस। हालांकि पुलिस ह सराब ले जात युवक ल गिरफ्तार कर ले हे, अऊ ओकर ले मिले जानकारी के अनुसार आगू के कार्रवाई करे जात हे।