बैंक के अधिकारी मन के लापरवाही … भुगतत हे किसान मन

बेमेतरा। जिला के दाढ़ी क्षेत्र के 150 ले जादा किसान मन फसल बीमा ल लेके अब्बड़ परेसान हे। बैंक के अधिकारी मन के लापरवाही के खामियाजा किसान मन भुगतत हे। छत्तीसगढ़ राज्य ग्रामीन बैंक दाढ़ी के तिर-तार सनकपाट, जांता, कोदवा, लालपुर, पचभैया के लगभग डेढ़ सौ किसान अइसे हे जेन मन केसीससी के माध्यम ले बैंक ले लोन ले रहिन। लोन के बेरा फसल बीमा के नाव ले किसान मन के खाता ले प्रीमियम घलो काटे गिस। फेर बैंक अधिकारी के लापरवाही ले किसान मन के रसि काटे के बाद घलो फसल बीमा के प्रीमियम जमा नइ करे गिस। जेकर चलत अब किसान मन फसल बीमा के क्लेम ले वंचित रह गिन। जब एकर सिकायत कलेक्टर ले करे गिस त कलेक्टर ह तत्काल जांच के आदेस दिस।