corona : गरियाबंद जिला म फेर होय हे कोरोना के 16 नवा मरीज के पहचान
जय जोहार…. छत्तीसगढ़ म कोरोना (corona) संक्रमित मरीज मन के संख्या ह सरलघा बाढ़त जावत हे। प्रदेश के गरियाबंद जिला म आज कोरोना के 16 नवा मरीज मिले हे।
एमा बिन्द्रानवागढ़ विधायक डमरूधर पुजारी के परिवार के 6 सदस्य ह घलो शामिल हे। उहचे कलेक्ट्रेट के एक कर्मचारी अऊ ओखर परिवार के चार सदस्य घलो संक्रमित मिले हे। एखर आलावा राजिम क्षेत्र ले पांच लोगन मन के रिपोर्ट ह पाजिटिव आय हे।
जिला मुख्य चिकित्सा अधिकारी एनआर नवरत्न ह बताइस कि विधायक डमरूधर पुजारी के परिवार के छह सदस्य ह संक्रमित मिले हे। विधायक के (corona) पाजिटिव पाय जाय के बाद आज ओखर परिवार के सदस्य मन के जांच करे गिस, जेमा ओखर पत्नी अऊ लईका घलो शामिल हे।
उहचे कलेक्ट्रेट एनआईसी के एक अधिकारी अउ ओखर परिवार के चार सदस्य के रिपोर्ट घलो (corona) पाजिटिव आय हे। एखर आलावा राजिम क्षेत्र के पांच लोगन मन के रिपोर्ट ह पाजिटिव आय हे।
