राजिम अरध कुंभ मेला अब राजिम पुन्नी मेला

दुर्ग। राजिम अरध कुंभ मेला के नाव अब राजिम पुन्नी मेला होही।  धर्मस्व एवं संस्कृति मंत्री ताम्रध्वज साहू ह शंकराचार्य स्वामी ले मुलाकात के बाद मंच ले एखर घोसना करिन। बता दन के पूरी पीठाधीश्वर शंकराचार्य स्वामी निश्चलानंद दुर्ग के आदर्श नगर म धार्मिक आयोजन म पहुंचे हे। मुख्यमंत्री भूपेश बघेल ह राजिम महोत्सव बर  शंकराचार्य ल मंच ले ही निमंत्रण दिस।

मंत्री साहू ह कहिन के राजिम कुंभ के विषय म एक निरदेस मिले हे। पहिली सरकार  ह एला कुंभ के नाम देय हे।  हमार शास्त्र मन म  चार महाकुंभ के जिक्र हे।  हमार राजिम के मेला त बहुत पुराना हे, जब ले मंदिर बने हे तब ले इहां मेला लगत रहिस हे। अउ एला  पुन्नी मेला कहत रहिन हे।

ताम्रध्वज साहू  ह कहिन के  मुख्यमंत्री ह निरदेस देय हे के अब ओखर नाम राजिम पुन्नी मेला रखे जाए। हमार छत्तीसगढ़ के संस्कृति के हिसाब ले सारा कार्यक्रम अउ धार्मिकता ले आयोजन होही। संग ही छत्तीसगढ़ के हमार तीर्थ अउ पर्यटन स्थल के विकास करे जाही। जगा जगा मेला महोत्सव करे जाही।  ताकि लोगन ल हमार सांस्कृतिक पूंजी अउ छत्तीसगढ़ के तीर्थ स्थल के बारे म जानकारी होही।