कुंआ म तैरत मिलिस दू झन मासूम के लाश, परिजन मन ल हत्या के शंका

कोरबा. जिले के भैसखटाल (ढोढ़ीपारा) गांव के एक कुंआ म आज दो झन मासूम लइका मन के शव मिले ले इलाका म हड़कंप मच गे हे। दूनो मासूम मन चचेरा भाई बहन हरे। लइका के बाप ह हत्या के शंका जताय हे। सीएसईबी चौकी के पुलिस ह लाश ल पोस्टमार्टम करे बर भेजीन हे।

पुलिस के अनुसार भैसखटाल के रहवईया नारायण चौहान के बेटा आकाश चौहान (7) अउ देवा चौहान के बेटी नेहा चौहान (7) ह कल रात कन घर ले गायब रिहिस। घर वाले मन ह आसपास वोमन ल बहुत खोजिन हे फेर कोई जानकारी नई मिलिस। आज वो दूनो लइका के शव ह घर के पास एक कुंआ म तैरत मिलिस। मृतक के पिता ह एक झन युवक ऊपर लइका मन के हत्या करे के शक जताय हे। पुलिस ह एक युवक ल हिरासत म लेके पूछताछ करे म जुटिन हे। पुलिस के कहिना हे कि पोस्टमार्टम रिपोर्ट आए के बाद ही मउत के असल वजह ह सामने आ सकही। उंहे लइका मन के परिजन ह उंकर मउत ल हत्या बतात जांच के मांग करे हे।