20 के मुंबई म रिलीज होही “मिल गईली चंदनिया”

जय जोहार. छत्तीसगढ़ के जाने माने मशहूर निर्माता-निर्देशक संतोष जैन द्वारा निर्मित पहली भोजपुरी फीचर फिल्म  “मिल गईली चंदनिया” काली ले मुंबई म रिलीज होने वाला हे। एखर पहिली ए फिलिम ह भिलाई अऊ उत्तर प्रदेश के कई सिनेमाघरों में अच्छा प्रदर्शन करे हे।

निर्माता निर्देशक संतोष जैन ह एखर पहिली छत्तीसगढ़ी फिलिम अऊ विज्ञापन निर्माण के काम करे हे। ओमन बतईन कि भोजपुरी भाषा म फिलिम बनाए के बेरा म अईसे लागिस नई हे कि हम दूसर भाषा ल लेके काम करत हन। भोजपुरी अऊ छत्तीसगढ़ी भाखा म ज्यादा अंतर नई हे। उत्तर प्रदेश सरकार द्वारा मिले सहयोग ले आभार व्यक्त करत संतोष जैन ह कहिन कि हमर सरकार घलो अईसने मदद करे ताकि इहां घलो लगातार फिलिम के निर्माण होए। संतोष जैन ह बताईन कि ऐ फिलिम म बनाए म गाना लिखे ले लेके शूटिंग अऊ एडिटिंग के काम बुता म अरुण यादव अऊ प्रभाकर बर्मन ह निर्देशन म पूरा साथ दिस। फिलिम निर्माण ईरा फिल्म्स के बैनर तले करे गे हे।

ऐ फिलिम म आकाश सोनी ह लड़का अऊ लड़की दूनों के अभिनय ल अकेल्ला करे हे। जेन ल काफी पसंद करे जात हे। ओखर अपोजिट प्रिया शर्मा के संग कौशल उपाध्याय, भिलाई के कलाकार उपासना वैष्णव, हेमलाल कौशल, देवेंद्र पांडे सहित भोजपुरी के ग्लोरी मोहंता अऊ रजा मुराद ह घलो अभिनय करे हे। फिलिम के संपादन योगेंद्र जोशी सतीश देवांगन अऊ राहुल ह मिलके करे हे। फिलिम के कुछ गीत ल प्रभाकर बर्मन अऊ संतोष जैन ह लिखे हे। उत्तर प्रदेश के झांसी अऊ छत्तीसगढ़ के धमतरी जिला म ऐ पूरा फिलिम के शूटिंग रे गे हे। कैमरा प्रकाश राठौड़ अऊ दीपक बावनकर के संग जैक नेताम ह करे हे।