2019 बर  अलग-अलग डायरी अउ कैलेण्डर छपवाए म  लगिस रोक

रायपुर । राज्य सरकार ह राजस्व विभाग अउ पर्यटन विभाग ल छोड़ के अन्य सबो विभाग, निगम, मंडल आदि सार्वजनिक उपक्रम म नवां कैलेण्डर वर्ष 2019 बर  अलग-अलग डायरी अउ कैलेण्डर छपवाए म  रोक लगा दे हे।  सबो विभाग मन अउ सासकीय संस्था मन ल सिरिफ राजस्व विभाग ह मुद्रित सरकारी डायरी-कैलेण्डर मन के उपयोग करे के निरदेस दिए गे हे ।

मुख्यमंत्री भूपेश बघेल ह सरकारी खरचा म मितव्ययिता बरते बर अधिकारी मन ल देए गे निरदेस म त्वरित अमल करत हुए सामान्य प्रसासन विभाग ह ए  सिलसिला म कल सबो विभाग मन ल इहां  मंत्रालय (महानदी भवन) ले परिपत्र जारी कर दे गेहे।।

परिपत्र म कहे गेहे के राजस्व विभाग ह सासकीय डायरी अउ कैलेण्डर के मुद्रन करवाया जात हे, एखर अलावा विभिन्न विभाग, निगम अउ मंडल मन ह घलोक  अलग-अलग डायरी अउ कैलेण्डर छपवाथे।

परिपत्र म मितव्ययिता के संबंध म मुख्यमंत्री भूपेश बघेल के निरदेस के उल्लेख करत हुए कहे गेहे के पर्यटन विभाग ले छोड़ के सेस सबो विभाग, निगम अउ मंडल आदि राजस्व विभाग के सासकीय डायरी अउ कैलेण्डर के ही उपयोग करही।