लॉकडाउन म फंसे जांजगीर जिला के 24 श्रमिक मन के होइस घर वापसी, हेल्थ चेकअप के बाद बस ले भेजे गिस गृहग्राम

जय जोहार बलौदाबाजार…. कोरोना लॉकडाउन के चलत जिला म फंसे जाजंगीर-चांपा जिला के 24 श्रमिक मन ल आज ओखर गांव ऊ घर बर रवाना करे गिस। एखर पहली स्वास्थ्य परीक्षण ले संतुष्ट होय के बाद ओ मन ल यात्री वाहन ले भेजे गिस। उल्लेखनीय हे कि राज्य सरकार ह राज्य के भीतर फंसे हुए श्रमिक मन ल ओखर इच्छा के अनुरूप गृह जिला अऊ गांव भेजे के व्यवस्था करे ल प्रशासन ल केहे हे।

ए क्रम म जिला कलेक्टर कार्तिकेया गोयल के निर्देश म एसडीएम अऊ इंसिडेंट कमांडर लवीना पांडेय के तरफ ले मजदूर मन के सकुशल घर बापसी बर सबो इंतजाम करे गिस। ए संबंध म एसडीएम लवीना पांडेय ह बताइस कि बलौदाबाजार तहसील के अंतर्गत ए मजदूर मन ह ग्राम ठेलकी म गत  महीने भर ले अस्थायी राहत शिविर म ठहराय गे रहिस। ये श्रमिक मन ह जल संसाधन विभाग के अंतर्गत एक ठेकेदार के तरफ ले कराय जावत नहर लाइनिंग कार्य में लगे रहिस।