26 मरीज मन ह जीतिस कोरोना ले जंग, अस्पताल ह करिन डिस्चार्ज

जय जोहार…. अंबिकापुर कोविड अस्पताल ले आज 26 मरीज ल डिस्चार्ज करे गे हे। मरीज मन के रिपोर्ट ह निगेटिव आय के बाद छुट्टी दे दे गे हे। डिस्चार्ज सब्बो मरीज ह सरगुजा संभाग के हे। जेमा कोरिया जिला ले 6, सूरजपुर ले 1, बलरामपुर ले 3, जशपुर ले 1 अऊ सरगुजा ले 15 मरीज ह शामिल हे। कोविड-19 अस्पताल ले तीन साल के लईका ह घलो कोरोना ले जंग जीत गे हे।
अंबिकापुर म 100 बेड के कोविड-19 अस्पताल बनाय गे हे। ए अस्पताल म पांच वार्ड बनाय गे हे। इहां सरगुजा संभाग के 157 कोरोना संक्रमित मरीज मन के इलाज करे गे हे। जेमा ले कुल मिला के 98 मरीज ह स्वस्थ हो के अपन घर लहुट चुके हे। अंबिकापुर के कोविड-19 अस्पताल म पांच जिला के लोगन मन के इलाज करे जावत हे। बता दें कि अंबिकापुर के एक कोरोना पाजिटिव ह जेन उदयपुर ले पाय गे रहिस, ओला छोड़ के बाकी सब्बो ह स्वस्थ हो गे हे।