Corona: बलौदाबाजार बर राहत भरे खबर, 28 मरीज मन ह जीतिस कोरोना ले जंग, अस्पताल ह करिन डिस्चार्ज

जय जोहार…. बलौदाबाजार जिला ले कोरोना (corona) ले जुड़े राहत भरे खबर आय हे। जिला के 28 कोरोना संक्रमित मरीज मन ह कोरोना (corona) ले जंग जीत गे हे। एखर बाद जिला कोविड अस्पताल ले सब्बो ल डिस्चार्ज कर दे गे हे।
जिला मुख्य स्वास्थ्य अऊ चिकित्सा अधिकारी डॉ खेमराज सोनवानी ह बताइस कि आज पहली बार एक संग जिला कोविड अस्पताल ले 28 मरीज स्वस्थ हो गे हे। जेखर बाद ओ मन ल वापस घर भेज दे गे हे। ए 28 मरीज मन म 10 महिला, 17 पुरुष अऊ एक लईका हे।

एमा ले 18 मरीज ह बलौदाबाजार विकासखण्ड के ग्राम धाराशिव अऊ 10 मरीज ह लवन नगर ले हे। एहतियात के तौर म सब्बो मरीज ह अभी होम क्वारेंटाइन म रही।
वो हा बताइस कि जिला स्वास्थ्य विभाग के सूची के अनुसार जिला म कोरोना (corona) संक्रमित कुल मरीज मन के संख्या ह 226 हे। जबकि एक्टिव मरीज मन के संख्या ह 76 हे।

जेमा ले जिला कोविड अस्पताल म 24 अऊ रायपुर के अलग-अलग अस्पताल म 52 मरीज मन के इलाज जारी हे। ऊहचे 150 मरीज मन ल स्वस्थ होय के बाद डिस्चार्ज कर दे गे हे।