Corona: देश म बीते 24 घंटा म बाढ़ गे कोरोना के 3.32 लाख नवा मरीज, पढ़व

जय जोहार…. देश म कोरोना (Corona) संक्रमण के मामला ह सरलघा बाढ़त जावत हे। देश म बीते 24 घंटा म कोरोना के 3.32 लाख ले जादा नवा मरीज सामने आय हे। उहचे 1 लाख 93 हजार 279 मरीज मन ल बने होय के बाद अस्पताल ले छुट्‌टी दे दे गे हे। जबकि इलाज के दौरान 2263 मरीज के जान चले गे हे।

केंद्रीय स्वास्थ्य मंत्रालय ले जारी आंकड़ा के मुताबिक देश म बीते 24 घंटा म कोरोना (Corona) के 3 लाख 32 हजार 730 नवा मामला मिले हे। एला मिला के कोरोना संक्रमण के मामला ह 1 करोड़ 62 लाख 63 हजार 695 हो गे हे। जेमा ले 24 लाख 28 हजार 616 एक्टिव मामला हे।

उहचे 1 करोड़ 36 लाख 48 हजार 199 संक्रमित मन ह कोरोना (Corona) ल मात दे दे हे, जेखर बाद ओ मन ल अस्पताल ले छुट्‌टी दे दे गे हे। ए वायरस ले देश म अब तक 1 लाख 86 हजार 920 मरीज के मौत हो गे हे।