30 फीट के ऊंचाई ले गिरे ले महिला के मउत

जगदलपुर। सहर से करीब 30 किमी के दूरी म आकार लेवत निर्मानधीन एनएमडीसी इस्पात संयंत्र म सुरक्षा उपकरन मन के अभाव म अउ लापरवाही के चलत इहां कार्यरत मजदूर लगातार हादसा के सिकार होवत हे।  गुरुवार के संझा इहां एक महिला मजदूर के करीब 30 फीट के ऊंचाई ले गिरे के कारन मउत हो गिस हे।

नगरनार थाना प्रभारी एमन साहू ह बताइस के एसीडब्लू कंपनी म काम करइया सोनमणि निवासी धमधाहाण्डी (ओड़िसा) निर्मानधीन इमारत म सीढ़ी मन के सहारे ऊंचाई म काम करत रहिस हे। काम करे के बाद महिला मजदूर ह नीचे उतरत रहिस के ए दउरान पैर फिसल गिस अउ लो ह सोझे जमीन म गिर पड़ीस।

 गिरने ले महिला मजदूर के सिर म गहरी चोट लगीस। ओला गम्भीर हालत म अस्पताल पहुंचाय गिस। जिहां चिकित्सक मन ह ओला मृत घोसित कर दिस। पुलिस ह मर्ग कायम कर मामला के जांच सुरू कर दीस हे।  उहें देर संझा होय के  वजह ले मृतिका के पीएम नइ हो पाइस हे।  पुलिस के मुताबिक शुक्रवार के बिहनिया पीएम के बाद शव ल परिजन मन ल सउप देय गिस।