कृषि जैव प्रौद्योगिकी म 30 स्नातकोत्तर विद्यार्थी मन ल मिलही हर महीना 7500 रूपिया के फैलोशिप

जय जोहार…. इंदिरा गांधी कृषि विश्वविद्यालय रायपुर म कृषि जैव प्रौद्योगिकी के स्नातकोत्तर पाठ्यक्रम म 30 नवा सीट ल स्वीकृत करे गे हे। एमा प्रवेश ल जैव प्रौद्योगिकी विभाग भारत सरकार के तरफ ले आयोजित राष्ट्रीय चयन परीक्षा ले दे जाही। पढ़ई करइया विद्यार्थी मन ल वित्तीय सहयोग प्रदान करही। ए कार्यक्रम के खाती कृषि जैव प्रौद्योगिकी म स्नातकोत्तर पाठ्यक्रम के 30 विद्यार्थी मन ल गुणवत्तापरक शिक्षा बर हर माह 7500 रूपिया के फैलोशिप दे जाही। ए वित्तीय सहयोग ल पंद्रहवे वित्तीय आयोग 2020-21 ले 2024-25 के खाती उपलब्ध कराय जाही। ए कार्यक्रम के खाती जैव प्रौद्योगिकी सुरक्षा बल के तरफ ले देश भर म सिरिफ 8 कृषि विश्वविद्यालय के चयन करे गे हे। जेमा इंदिरा गांधी कृषि विश्वविद्यालय रायपुर घलो शामिल हे।

गौरतलब हे कि मानव संसाधन विभाग, भारत सरकार के खाती संचालित जैव प्रौद्योगिकी कार्य बल के तरफ ले स्नातकोत्तर स्तर पर गुणवक्तायुक्त जैव प्रौद्योगिकी शिक्षा उपलब्ध कराय बर योजना ल सुरू करे गे हे। ए योजना के खाती शिक्षा, प्रशिक्षण, नवाचार, अनुसंधान अऊ विकास ल बढ़ावा दे बर देश भर म योग्य अऊ प्रतिष्ठित शिक्षा संस्थान के चयन करे जावत हे। संस्थान के चयन ल वहां प्रशिक्षित शिक्षक, प्रयोगशाला सुविधा अऊ आन अधोसंरचना के उपलब्धता के आधार म करे जात हे। ए बात ल धियान म रखत हुये इंदिरा गांधी कृषि विश्वविद्यालय रायपुर के चयन घलो ए कार्यक्रम के खाती करे गे हे।