Corona : बलौदाबाजार जिला के 39 मरीज मन ह जीतिस कोरोना ले जंग, अब सक्रिय मामले के संख्या होइस 69

जय जोहार…. बलौदाबाजार जिला बर कोरोना (corona) ले जुड़े राहत भरे खबर आवत हे। जिला के 39 संक्रमित मरीज ह कोरोना (corona) ले जंग जीत गे हे। एखर बाद अलग-अलग अस्पताल ले मरीज मन ल छुट्‌टी दे दे गे हे। जिला मुख्य स्वास्थ्य अऊ चिकित्सा अधिकारी डॉ. खेमराज सोनवानी ह बताइस कि आज रायपुर एम्स ले एक मरीज, माना कोविड अस्पताल ले 34 मरीज अऊ मेकाहारा कोविड अस्पताल ले चार मरीज ह डिस्चार्ज होय हे। एमा 14 महिला अऊ 25 पुरुष शामिल हे।

आज डिस्चार्ज होय लोगन मन म पलारी विकासखण्ड के कोनारी ले 2, रामपुर ले 2, पलारी नगर ले 2, बिलाईगढ़ विकासखण्ड के अंतर्गत लुकापारा ले 1, पुरगांव ले 5, मनपसोर ले 5, चन्द्रनगर ले 1, डोंगियाभाटा ले 1 अऊ बिनोधा ले एक मरीज शामिल हे। भाटापारा विकासखण्ड के अंतर्गत भाटापारा नगर ले एक, अवरेटि ले एक, बलौदाबाजार विकासखण्ड के अंतर्गत ग्राम बगबुड़ा ले एक, धाराशिव ले 5, लवन ले सात, कसडोल विकासखण्ड के अंतर्गत नरधा ले पांच अऊ सिमगा कचलोन के दू मरीज शामिल हे।

ऊहचे आज जिला म बलौदाबाजार विकासखण्ड के अंतर्गत ग्राम बगबुड़ा म एक अऊ कोरोना (corona) संक्रमित मरीज के पहचान होय हे। एखर पुष्टि ल जिला प्रशासन के ओर से करे गे हे। अब स्वास्थ्य विभाग के लिस्ट के अनुसार जिला म कुल संक्रमित मरीज मन के संख्या ह 119 हे। एमा सक्रिय मामले के संख्या ह 69 हे। ऊहचे 50 लोगन मन ह स्वस्थ होके अपन घर लहुट चुके हे।