4 के विधायक मन ल सदस्यता के सपथ दिलाही प्रोटेम स्पीकर रामपुकार सिंह … इहीं दिन विधानसभा के नवां अध्यक्ष के चुनाव…. अधिसूचना घलो जारी

रायपुर। छत्तीसगढ़ म कांग्रेस के नवां सरकार के गठन के बाद पहिली बेर  छत्तीसगढ़ विधानसभा सत्र बुलाए गेहे। ए सत्र 4 ले 11 जनवरी तक चलही। ए सत्र म प्रदेस के समस्त नवां विधायक मन ल विधानसभा के सदस्यता दिलाए जाही। संगे-संग विधानसभा के नवां अध्यक्ष के निर्वाचन होही। सत्र बर  विधानसभा ले  अधिसूचना घलो जारी कर दे गेहे।

जारी अधिसूचना म 4 जनवरी के विधानसभा चुनाव 2018 म नवनिर्वाचित समस्त विधायक मन ल सदन म सपथ दिलाए जाही। एखर संग इहीं दिन विधानसभा के नवां अध्यक्ष बर निर्वाचन होही।  विधायक मन ल सपथ प्रोटेम स्पीकर कांग्रेस के विधायक रामपुकार सिंह दिलाही।

एखर पहिली श्री सिंह 3 जनवरी के राजभवन म प्रोटेम स्पीकर बर सपथ लेंही। राज्यपाल आनंदीबेन पटेल उमन ल प्रोटेम स्पीकर बर सपथ दिलाही।  विधानसभा म सपथ ले के बाद 7 जनवरी के राज्यपाल आनंदीबेन पटेल के अभिभाषन होही।

9, 10 अउ 11 जनवरी के राज्यपाल के अभिभाषन के कृतज्ञता ज्ञापन प्रस्ताव म चर्चा होही।  संग ही वित्तीय कार्य के साथ अन्य सासकीय कार्य घलो सम्पादित करे के संभावना हे।