Balodabazar जिला म मिलिस कोरोना के 40 नवा मामला, 5 लोगन मन के हो गे मौत

जय जोहार…. बलौदाबाजार (Balodabazar) जिला म आज कोरोना के 40 नवा मरीज के पहचान होय हे। उहचे 11 मरीज मन ल बने होय के बाद अस्पताल ले छुट्‌टी दे दे गे हे। जबकि इलाज के दौरान 5 लोगन मन के मौत हो गे हे।

(Balodabazar) जिला के मुख्य स्वास्थ्य अऊ चिकित्सा अधिकारी डॉ खेमराज सोनवानी ह बताइस कि आज जेन नवा मरीज मिले हे, ओमा कसडोल विकासखण्ड ले 15, सिमगा ले 7, भाटापारा ले 6, बिलाईगढ़ ले 5, बलौदाबाजार ले 4 अऊ पलारी ले 3 मरीज शामिल हे।

बता दन कि (Balodabazar) जिला म कोरोना संक्रमित मन के कुल संख्या ह बाढ़ के 1468 हो गे हे। जेमा ले 623 एक्टिव मामला हे। उहचे 823 लोगन मन ह कोरोना ले जंग जीत गे हे, जेखर बाद ओ मन ल अस्पताल ले डिस्चार्ज कर दे गे हे। ए वायरस ले जिला म अब तक 16 लोगन मन के मौत हो गे हे।