Corona: प्रदेश म पिछिले 24 घंटा म मिले हे कोरोना के 521 नवा मामला, रायपुर म घलो 95 पाजिटिव
जय जोहार…. प्रदेश म पिछिले 24 घंटा म कोरोना (corona) के 521 नवा मामला के पहचान होय हे। उहचे 905 मरीज मन ल बने होय के बाद अस्पताल ले छुट्टी दे दे गे हे। जबकि इलाज के दौरान 6 संक्रमित मन के मौत हो गे हे।
बीते 24 घंटा म कोरोना (corona) के जन नवा मरीज के पहचान होय हे, ओमा रायपुर ले 95, दुर्ग ले 47, बिलासपुर ले 46, धमतरी ले 38, राजनांदगांव ले 37, रायगढ़ ले 32, महासमुंद ले 30, बालोद ले 21, कोरिया ले 19, बलौदाबाजार ले 16, सरगुजा अऊ सूरजपुर ले 15-15, बेमेतरा, कोरबा, बलरामपुर अऊ बस्तर ले 12-12 मरीज शामिल हे।
बता देन कि प्रदेश म कोरोना (corona) संक्रमित मरीज मन के संख्या ह 2 लाख 92 हजार 612 हो गे हे। जेमा ले 6923 एक्टिव मामला हे। उहचे 2 लाख 82 हजार 145 लोगन मन ह कोरोना ल मात दे दे हे, जेखर बाद ओ मन ल अस्पताल ले डिस्चार्ज कर दे गे हे। ए वायरस ले प्रदेश म अब तक 3544 लोगन मन के मौत हो गे हे।
