मुठभेड़ म 7 नक्सली मारे गिन, भारी मात्रा म हथियार अउ गोला-बारूद बरामद
राजनांदगांव। छत्तीसगढ़ के राजनांदगांव म शनिवार के डिस्ट्रिक्ट रिजर्व ग्रुप (डीआरजी) के जवान अउ नक्सली मन के बीच मुठभेड़ होईस। जेमा 7 नक्सली मारे गिन। मौका ले भारी मात्रा म गोला बारूद बरामद करे गे हे।
फिलहाल इलाका म सर्चिंग जारी हे। छत्तीसगढ़ के पुलिस प्रमुख डीएम अवस्थी हा मुठभेड़ के पुष्टि करे हें। जानकारी के मिले हे कि, डीआरजी के जवान मन शनिवार के बिहनिया 8 बजे बागनदी इलाका म सर्चिंग करे बर निकले रिहिन।
इही दौरान जवान मन ला महाराष्ट्र सीमा ले लगे शेरपार अउ सीतागोटा के बीच पहाड़ी मन म नक्सली मन के होय के सूचना मिलिस। तब डीआरजी के संगे-संग छत्तीसगढ़ आर्म्स फोर्स (सीएएफ) अउ जिला पुलिस बल ला रवाना करे गिस।
एकर बाद जवान मन हा नक्सली मन ऊपर धावा बोल दीन। कार्रवाई म सात नक्सली मारे गिन। जवान मन हा नक्सली मन के लास मन ला बरामद कर ले हें। एके-47 समेत भारी मात्रा म गोला-बारूद बरामद होए हे।
