रायपुर। छत्तीसगढ़, मध्यप्रदेश अउ राजस्थान म 2018 म चुनाइ होवइया हे। ये तीनों राज्य मन म भाजपा सत्ता म काबिज हे अउ अवाइया चुनाइ म घलो बीजेपी फेर ले सरकार बनाय के जुगत म हे। भाजपा के राष्ट्रीय अध्यक्ष अउ चुनाव प्रबंधन म पारंगत अमित शाह ये दफा खुद चुनाइ के बागडोर संभालही। करीबन दू महीना पहिली ले उंखर भोपाल ल हेड क्वार्टर बनाय जाय के चरचा चलत रहिस हे। जेमा अंमित मुहर लग चुके हे।
जानकारी म भोपाल म बंगला 74 के B-12 ल अमित शाह बर तइयार करे जात हे। जिहां ले अमित शाह बइठके मध्यप्रदेश, राजस्थान अउ छत्तीसगढ़ के चुनाइ के कमान संभालही। अइसे बताय जात हे के अगस्त ले अमित शाह बंगला म बइठे लगही अउ चुनावी रणनीति के सुरुआत हो जाही। अमित शाह चुनाव के करीब आय के संग ही उहां नियमित रुप ले रहही अउ तीनों राज्य म भाजपा के सरकार बनाय के गुना-भाग करही।
