रायपुर। छत्तीसगढ़ के कृषि मंत्री बृजमोहन अग्रवाल आज हरियाणा के रोहतक म आयोजित तीन दिवसीय एग्रीकल्चर लीडरशिप समिट म सामिल होइस। श्री अग्रवाल ह समिट म कई ठन विभाग के स्टाल मन के अवलोकन करिन अउ हरियाणा के किसान मन ले खेती किसानी के संबंध म चर्चा करिन। श्री अग्रवाल ह मुख्य कार्यक्रम म अपन उदबोधन म कहिन कि आज देश म गांव मन, गरीब मन अऊ किसान मन के हित म काम करइया सरकार हे। प्रधानमंत्री श्री नरेन्द्र मोदी के नेतृत्व म ये सरकार देश के किसान मन के आय ल दुगुना करे के दिशा म तेज गति ले काम करत हे। अइसन म हम निश्चित रूप ले कहि सकत हवन के देश के किसान मन के भविष्य उज्जवल होही अऊ गांव के देश भारत सशक्त अऊ खुशहाल बनही। रोहतक के ए समिट के शुभारंभ हरियाणा के मुख्यमंत्री श्री मनोहर लाल खट्टर ह करिन। शुभारंभ समारोह के अध्यक्षता केन्द्रीय कृषि राज्य मंत्री श्री पुरूषोत्तम रुपाला ह करिन। ए अवसर म हरियाणा के कृषि मंत्री श्री ओमप्रकाश धनगढ़ घलोक उपस्थित रहिन।
समिट के शुभारंभ समारोह म विशिष्ट अतिथि के रूप म संघरे कृषि मंत्री श्री बृजमोहन अग्रवाल ह कहिन कि हरियाणा कृषि अऊ पशुपालन के क्षेत्र म अग्रणी राज्य हे। हमर नौजवान छत्तीसगढ़ राज्य घलोक मुख्यमंत्री डॉ. रमन सिंह के नेतृत्व म प्रदेश के किसान मन ल खुशहाल बनाए बर कई ठन योजना मन के संग काम करत हे। छत्तीसगढ़ म उन्नत खेती ल बढ़ावा देहे म हम हरियाणा राज्य ले उपयोगी सीख ले सकत हवन। ए अवसर म श्री अग्रवाल ह मुख्यमंत्री श्री खट्टर अऊ कृषि मंत्री श्री धनगढ़ के संग उन्नतशील किसान मन ल सम्मानित करिन।
