रायपुर । छत्तीसगढ़ के राजधानी म पूरा सरकार बइठे हुए हे। पूरा नगर निगम मउजूद हे । फेर इहां लोगन मन ल पीये के साफ पानी नइ ह मिलत हे। आप मन ल बता दन कि रायपुर शहर के पंचशील नगर, नहरपारा अउ मोवा म करीब 50 ले जादा लोग पीलिया ले पीड़ित हे। इही करम म एक गरभवती महिला के पीलिया ले मउत घलो हो गेहे।
मालूम होही कि पीछू दिन पहिली लोक स्वास्थ्य यांत्रिकी (पीएचई) विभाग ह इहां रहइया लोगन मन नम के घर मन ले पीए के पानी के नमूना ले रिहिस हे। उहीं जांच के दउरान ये नमूना म घातक ईकोलाई बैक्टीरिया पाए गेहे। आप मन ल बता दन कि न केवल निगम के अवइया पानी म बल्कि बोर के पानी म घलोक ये बैक्टीरिया पाए गेहे। एती स्वास्थ्य विभाग के अफसर मन के कहिना हे कि गरमी म पीलिया के प्रभाव सबले जादा होवत हे। अइसे म पूरा प्रदेश म ये ला लेके अलर्ट जारी करे गेहे। मामला म जानकारी देवत हुए स्वास्थ्य विभाग के प्रमुख सचिव सुब्रत साहू के कहिना हे कि पीलिया ल लेके राजधानी के सबो हॉस्पिटल्स ल अलर्ट कर दे गेहे। उमन कहिन कि ये दउरान अगर कोनो एरिया ले पीलिया के केस आवत हे, तो ओखर तुरंतचे इलाज उपलब्ध कराए जाए। एखर संग उमन ह नगर निगम ल घलो सूचित कर देहे।
