रायपुर। भाजपा के रास्ट्रीय अध्यक्ष बुधवार के अमित शाह ओडिशा जात बेरा लगभग डेढ़ घंटा रायपुर एयरपोर्ट म रुकिस। अमित शाह ले भेंट करे बर मुख्यमंत्री रमन सिंह, धरमलाल कौशिक, सरोज पांडे समेत जम्मों बड़े नेता पहुंचिन। शाह ह नेता मन ले औपचारिक भेंट करिस। ये दउरान प्रदेस अऊ रास्ट्रीय मुद्दा उपर चर्चा घलो होइस। अमित शाह ह अपन निजी अनुभव घलो प्रदेस के नेता मन के संग साझा करिस।
स्कूली वैन नहर म गिर गिस
रायगढ़ के कोसीर इलाका म एक स्कूली वैन नहर म गिर गिस। ये हादसा म लगभग 12 लइका जख्मी हो गिन। एमन ल तत्काल सारंगढ़ के अस्पताल म भर्ती कराए गिस। स्कूली वैन ज्ञान गंगा पब्लिक स्कूल के रिहिस। एक वैन म अतका लइका मन ल ले जाए उपर सवाल उठे हे। अक्सर स्कूल के छोटा वैन म लईका मन ल ठूंस-ठूंस के भर दे जात हे। ये हादसा के बाद लइका मन बहुत डरे हुए हे। उहें परिजन मन म बहुत आक्रोस दिखाई देत हे।
कोंडागांव प्रधानमंत्री आवास योजना म देस म 19वां स्थान
सासन द्वारा चलाए जात प्रधानमंत्री आवास योजना के तहत हितग्राही मन बर सासन घर बनाके देत हे। उहें ये योजना म कोंडागांव ल अच्छा सफलता मिले हे। आप मन ल बता दन कि जिला म 2546 स्वीकृत आवास म ले 2077 आवास बन चुके हे, अऊ एकर चलत कोंडागांव ल ये योजना म राज्य म 6वां अऊ देस म 19वां स्थान मिले हे।
पटवारी ह फर्जी पट्टा थमा दिस
कोरिया जिला के बालशिव गांव म पइसा लेके फर्जी पट्टा बनाए के मामला आगु आए हे। ग्रामीन मन के आरोप हे कि पटवारी रमेश राम ह पहिली त पट्टा बनाए के नाव म रूपिया लिस, अऊ ओहर फर्जी पट्टा थमा दिस। जेला लेके ग्रामीन मन कलेक्टर ले आवेदन करके नियाय के गुहार लगाइन हे। सिकायत के बाद तहसीलदार ह जांच के बाद कार्रवाई के बात कहे हे।
