आदिम जाति कल्याण विभाग के आयुक्त सिदार कटघरा म

रायपुर । राजधानी रायपुर म आदिम जाति कल्याण विभाग के आयुक्त आरके सिदार उपर आदिवासी छात्र मन के छात्रवृत्ति के रासी गबन करे जाए के बड़ा मामला आगू आइस हे। आरके सिदार उपर 1 करोड़ 66 लाख रूपिया के रासी गबन करे के आरोप लगे हे।
मिले जानकारी के अनुसार बरस 1999 ले के बरस 2015 तक सिदार ह लगभग अलग-अलग मामला म 1 करोड़ ले जादा के रासी छात्रवृत्ति के नाम म अउ फरजी नियुक्ति करके आहरण करे हे। ये पूरा मामला के जानकारी आरटीआई के माध्यम ले मिलिस । छात्र नेता सैयद उमर ह बताइन कि आयुक्त सिदार ह ओरिएंटल बैंक आफ कामर्स म नोडल खाता बनाके केंद्र ले मिले छात्रवृत्ति के रासी ल 48 बार सेल्फ अउ कैश के रूप म बैंक ले आहरित कर ले हे।
बैंक के खाता नंबर 09722011041087 के स्टेटमेंट म ये पूरा घोटाला के जानकारी मिले हे। एखर ले पहिली घलो विधानसभा म केदार कश्यप ह अपन विभाग के 21 अफसर उपर आर्थिक अपराध के मामला दरज होय के बात ल स्वीकार करे रहिन हे, जेमा आरके सिदार के घलोक नाम सामिल हे, लेकिन उखर अब तक कोनो प्रकार के कोनो कार्रवाई नइ हो पाए हे।