वन मंत्री महेश गागड़ा ल सतर्क रहे के हिदायत….निसाना म हे 300 नक्सली मन के

रायपुर। इंटेलिजेंस रिपोर्ट म फोर्स ह वन मंत्री महेश गागड़ा ल सतर्क रहे के हिदायत दे हे। अंदेशा हे के चुनाव प्रचार के दउरान कभु भी वन मंत्री उपर नक्सली हमला कर सकत हे। उहें वन मंत्री महेश गागड़ा के सुरक्छा के लिहाज ले ओखर सुरक्छा घलो बढ़ा दे गेहे।
इंटेलिजेंस ब्यूरो ह एक चउकाना वाले खुलासा करिस हे, खुलासा के बाद ले छत्तीसगढ़ म हड़कंप मच गेहे। खुफिया रिपोर्ट म नक्सली मन ह वन मंत्री महेश गागड़ा के हत्या करे के साजिस रचे हे अउ ओखर बर उमन 300 लोगन के टीम के घलो गठन करिस हे। सुरक्था एजेंसी मन ह वन मंत्री गागड़ा ल सतर्क रहे के सलाह दे हे। बता दन के येखर पहिली घलो गागड़ा उपर कतको बार जानलेवा हमला हो चुके हे। गउरतलब हे के महेश गागड़ा प्रदेश के धूर नक्सल प्रभावित जिली बीजापुर के विधायक हे। उमन सुरू ले नक्सली मन के विरोध करत हे। चुनावी मउसम म गागड़ा ज्यादातर बेरा अपन गृहनगर भैरमगढ़ म ही रुकथे। उहां ले बीजापुर जिला के हर गांव म दउरा करथे।
सूत्र मन के कहिना हे के गागड़ा ल मारे बर 15 अगस्त या 26 जनवरी के अवसर तय करेगे रिहिस हे। नक्सली मन ह पिछु के 15 अगस्त म उँखर उपर हमला के योजना बनाइस रिहिस हे, लेकिन साजिस नाकाम रिहिस। ये घलो बताय जात हे के वन मंत्री ल मारे के जिम्मा बटालियन कमांडर एकाम ईडमा अउ विज्जा ल देय गेहे। ये संबंध म नक्सली मन ह जंगल म अपन साथी मन के संग बइठक करिन अउ योजना बनाइन के मंत्री अपन वाहन ले भैरमगढ़ जाही उही बेरा म उमन ल निशाना बनाय जाही। ये दउरान गागड़ा के संग 100 सुरक्षा बल तैनात होही, लेकिन 300 नक्सली मन आघू ये मन नाकाम साबित होही।