रायपुर। चुनाव सिर म हे , पार्टी सत्ता ले तीन बार ले दूर हे लेकिन नेता हे कि मनमुटाव ले बाज नइ आवत हे। कांग्रेस कार्यालय म आज अइसने डरमा देखे बर मिलिस। कांग्रेस भवन म दल के कार्यकारी अध्यक्ष शिव डहेरिया अउ रामदयाल उईके के प्रेस कॉन्फ्रेन्स रहिस हे लेकिन उही बखत म सांसद छाया वर्मा पीसी लेवक रहिन हे। ये मुद्दा ल लेके शैलेश नीतिन त्रिवेदी अउ शिव डाहरिया के बीच जमकर सब्द मन के बाण चलिस।
कांग्रेस भवन म सुकरवार के जबरदस्त तनातनी देखे बर मलिस हे। ये तनातनी कार्यकारी अध्यक्ष रामदयाल उइके, शिव डाहरिया व शिशुपाल शोरी अउ मीडिया विभाग के चेयरमेन शैलेश नीतिन त्रिवेदी के बीच होइस हे । ये माजरा पत्रवार्ता के ठीक पहिली देखे बर मलिस हे। सूत्र मन के मुताबिक शैलेश नीतिन त्रिवेदी, शिव डाहरिया के बीच जमकर विवाद होइस । नेता मन अतका नाराज होगे कि उमन इहा तक कह दिस कि अब जम्मो पत्रवार्ता शैलेश नीतिन ही कर लीही, हमन के जरुरत नइए। गुरुवार के कांग्रेस ह सूचना दीस कि सुकरवार के दोपहर 12.30 बजे कार्यकारी अध्यक्ष समेत विभिन्न कांग्रेसी प्रेस कांफ्रेस लेही। सुकरवार के सबों नेता कांग्रेस भवन पहुँचे रिहिन हे, ठीक पत्रवार्ता के पहिली शैलेश अउ शिव डाहरिया व रामदयाल उइके म अचानक बहस सुरु होगिस।
हालांकि बहस ह उग्र रुप नइ लिस अउ अंदरुनी गलतफहमी के वजह ले बातचीत होवत रहिन हे। लेकिन इही बहस के वजह ले पत्रवार्ता ल रद्द करना पड़िस। ये संबंध म तत्काल शैलेश नीतिन त्रिवेदी ह कहिन कि कोनो तरह के बहस नइ होय हे । बस चरचा होवत रिहिस हे । उमन पत्रवार्ता रद्द् होय म मीडिया ले क्षमा याचना करिस हे। कार्यकारी अध्यक्ष शिव कुमार डाहरिया, राम दयाल उइके अउ शिशुपाल शोरी विवाद के बाद सोझे सरकिट हाउस चले गिन अउ उमन कह दिस कि कोनो तरह के पत्रवार्ता अब केवल शैलेश जी ही लेंही। एससी-एसटी के मुद्दा म भी सबो बात अब उही करही।
