कांग्रेस ह गरीब मन बर कउनो काम नइ करिस हे : रमन

जगदलपुर म 3133 करोड़ रुपिया के बिकास कार्य के सउगात दिस सीएम
रायपुर। मुख्यमंत्री रमन सिंह ह शुक्रवार के एक दिबसीय बस्तर के दउरा म रहिस। ये बेरा सीएम ह बस्तरवासी मन ल 3133 करोड़ रुपिया के बिकास कार्य के सउगात दिस। ओहा बस्तर के महत्वाकांक्छी परियोजना रावघाट रेल लाइन के भूमिपूजन घलो करिस। बस्तरवासी लंबा बेरा ले येखर मांग करत रहिन हे। जगदलपुर ले रावघाट तक 140 किलोमीटर लंबा ये रेल लाइन के निरमान करीब 2 हजार 538 करोड़ रुपिया के लागत ले करे जाही। ये रेललाइन बस्तर, कोंडागांव, नारायणपुर अऊ कांकेर जिला ले गुजरही। सीएम ह जगदलपुर के ऐतिहासिक लालबाग मइदान ले आम सभा ल घलो संबोधित करिस। सीएम ह कहिस के बस्तर बर ये ऐतिहासिक दिन रहिस। रावघाट रेल परियोजना ले बस्तर म खुसहाली होही। येखर अलावा सीएम ह कांग्रेस ऊपर घलो निसाना साधिस ओहा कहिस के कांग्रेस ह गरीब मन बर कउनो काम नइ करिस हे।