प्रदरसन करइया छात्र मन के चेहरा ह खुसी से चमकगे जब कुलपतिह दीस इस्तीफा

रायपुर । हिदायतुल्ला नेशनल लॉ यूनिवर्सिटी मामला म एक नवा मोड़ आइस। जब कुलपति प्रोफेसर सुखपाल सिंह ह आखिरकार अपन पद ले इस्तीफा दे दिस। जेखर बाद ले प्रदरसन करइया छात्र- छात्रा मन के चेहरा म खुसी लउट आइस हे। बता दन के इहां पढ़इया छात्र पाछु के दिन मन ले कुलपति सुखपाल सिंह के खेलाफ प्रदरसन कर रहिन हे अउ भूख हड़ताल म उतर आइस हे।
गउरतलब हे के छात्र-छात्रा मन ह कुलपति उपर कुप्रबंधन, भ्रष्टाचार अउ यौन उत्पीड़न जइसे मामला के खेलाफ कार्रवाई करे म असफल रहे के आरोप लगात हुए इस्तीफा के मांग करे रहिस हे। येखर पहिली घलो सुखपाल सिंह के खेलाफ सेवा विस्तार के मामला म छात्र मन ह मोरचा खोल दिस हे। मामला ल लेके हाईकोरट ह नियम विरूद्ध ठहरात हुए सेवा समाप्त करे के आदेस कर दिस। लेकिन सुप्रीम कोरट म अपील कर के सुखपाल सिंह ल स्टे मिल गिस। येखर बाद सुखपाल सिंह ह वापस अपन कारयभार संभाल लेय रहिस हे।