कांग्रेसी नेता मन के तेवर बढ़िस… सस्पेंड कराय के धमकी देवत फेरत हे

रायपुर । सत्ता अभु कांग्रेस के झोली म नइ आए हे लेकिन कांग्रेस के नेता मन के तेवर बढ़ गेहे। अउ अधिकारी मन स  सस्पेंड कराय के धमकी देय बर सुरू कर देहे। परदेस  म चुनाई के बाद स्ट्रांग रूम के सुरक्षा ल लेके कांग्रेस लगातार चिंता जतात हे।  इहीं बीच म स्ट्रांग रूम के चौकीदारी म लगे कांग्रेसी नेता मन के संग पुलिसवाला मन ले झूमा झटकी घलो हो गिस हे। रायपुर पश्चिम विधानसभा म कांग्रेस के उम्मीदवार एक पुलिस कर्मी ले भिड़ गिस। दूनों के बीच जमके बहस होइस। एहीं दउरान कांग्रेस उम्मीदवार ह पुलिसवाला ल सस्पेंड करा देय के धमकी घलो दे डालिस।

रायपुर पश्चिम विधानसभा ले कन्हैया अग्रवाल कांग्रेस के प्रत्यासी हे। स्ट्रांग रूम के बाहिर  पुलिसवाला  के संग उंखर बहस के एक वीडियो सोसल मीडिया म वायरल होवत हे। ए वीडियो म कांग्रेस के नेता कहत हे के तय मोला  नइ जानत हस, सस्पेंड करा दूहूं तोला। नेता के ए बात ल सुने के बाद पुलिसवाला घलो जमके सुनाइस। दूनों के बीच म काफी देर तक बहसबाजी होवत रहिस । ए वीडियो दू दिन पहिली के बताय जात हे, जे शनिवार के सोसल मीडिया म वायरल होइस ।