करोड़पति मन ले भरे हे भूपेश के कैबिनेट ….. दू झन करत हे आपराधिक मामला के सामना

रायपुर। प्रदेस के नवनिर्वाचित मुख्यमंत्री भूपेश बघेल अउ उंखर कैबिनेट के सबो 12 मंत्री करोड़पति हवय, जबके दू मंत्रि ह धोखाधड़ी अउ जालसाजी के आरोप सहित आपराधिक मामला के सामना करत हवय। चुनाव निगरानी संस्था एसोसिएशन फॉर डेमोक्रेटिक रिफॉर्म्स (ADR)  के जारी करेगे एक विश्लेषन के मुताबिक, सबो कैबिनेट मंत्री करोड़पति हवय, जेखर औसत संपत्ति 47.13 करोड़ दरज करे गेहे।

पूर्व मुख्यमंत्री रमन सिंह के अगुवाई वाले भारतीय जनता पार्टी के 2013 वाले सरकार म कैबिनेट मंत्री मन के औसत संपत्ति 3.04 करोड़ रुपिया रहिस हे।  सिंह के कैबिनेट के 12 मंत्री म 11 करोड़पति रहिन हे। जबके 2008 कैबिनेट के औसत संपत्ति 0.81 करोड़ रुपिया रहिस हे अउ  13 मंत्री म  केवल चार ह अपन संपत्ति एक करोड़ ले अधिक होय के घोसना करे रहिस हे।

भपेश कैबिनेट म सबले अमीर मंत्री हे टी.एस. सिंह देव, जेखर संपत्ति 500 करोड़ ले अधिक हे, जेखर बाद मुख्यमंत्री बघेल के नंबर हे, जेखर तीर 23 करोड़ ले जादा के संपत्ति हवय। बात करन आपराधिक पृष्ठभूमि के त कोरबा के विधायक जयसिंह अग्रवाल अउ मुक्यमंत्री बघेल ह आपराधिक मामला के सामना करत हे।  जेमा जालसाजी, धोखाधड़ी अउ दंगा भड़काय के आरोप सामिल हे।

2008 अउ 2013 के तरह वर्तमान म घलो एकमात्र महिला मंत्री हे।  बघेल  ह 17 दिसंबर के राज्य के तीसर मुख्यमंत्री के रूप म सपथ लीस हे, उमन मंगलवार के नौ नवां मंत्री ल जगा देके कैबिनेट म विस्तार करिस हे। मउजूदा कैबिनेट के संख्या 12 हो गेहे।