नशेड़ी युवक ह धारदार हथियार ले पत्नी के हत्या कर खुद घलो लगाइस फांसी

महासमुंद। बसना थाना क्षेत्र के ठाकुरपाली म नशा के हालत म एक युवक ह धारदार हथियार ले अपन पत्नी ल मउत के घाट उतारे के बाद खुद घलोक फांसी लगाके आत्महत्या कर लीस।  पुलिस ह हत्या के मामला दरज कर विवेचना म ले हवय। शव के पंचनामा कर पीएम बर भेज देय गिस। घटना के जानकारी आज बिहनिया पुलिस ल मृतक के पिता श्रीमुख यादव ह दीस। पुलिस ले  मिले जानकारी के मुताबिक सोमवार रात करीबन 9 बजे आरोपी जयनारायण यादव (27) नशा के  हालत म घर पहुंचिन अउ सब्जी काटे के हसिया पकड़ के अपन माता-पिता ल जान ले मारे के धमकी दीस।

जेखर ले माता-पिता आरोपी के तीन वर्षीय पुत्र ल लेके  गांव के आंनद नायक के घर चले गिस। बहिनिया 7 बजे जब उमन वापिस लउटिन त घर के मुख्य प्रवेस द्वार बंद रहिस हे। दरवाजे के सुराग ले जब उमन नजर डालिस त अंदर के नजारा देख उंखर होस उड़गे। घटना के जानकारी उमन बसना पुलिस ल दीस।

 मउका म पहुंचे पुलिस ह दरवाजा तोड़के अंदर प्रवेस करिन त जमीन म खून ले लथपथ आरोपी के पत्नी सुभाषिनी यादव के लाश पड़े रहिस हे। उहें आरोपी के शव फांसी के फंदा म  झुलता हुए  मिलिस।  मृतक के पिता श्रीमुख यादव ह पुलिस ल बताइस के पति-पत्नी के बीच कोनो न कोनो बात ल लेके आए दिन विवाद होवत रहय। उमन के कहिना हे के  उंखर पुत्र हमेसा नशा के हालत म घर आवत रहिस हे अउ  विवाद सुरू हो जावय। काली घलोक उमन नशा के हालत म आइस अउ हम दूनों झन ल जान ले मारे के धमकी दीस. जेखर ले हमन  घर छोड़के गांव म ही दूसर के इहां चल देन। इहीं दउरान घटना ल अंजाम देय होही।