महंत के निरविरोध चुने जाए म बीजेपी अउ जोगी कांग्रेस ल धन्यवाद दिस रविन्द्र चौबे ह

रायपुर । संसदीय कार्यमंत्री रविन्द्र चौबे ह बीजेपी अउ जनता कांग्रेस छत्तीसगढ़ (जोगी) के नेता मन ल धन्यवाद दिस हे। चरणदास महंत ह विधानसभा अध्यक्ष पद बर नामांकन दाखिल करिन।  जेमा बीजेपी के तरफ ले पूर्व मुख्यमंत्री रमन सिंह अउ जोगी कांग्रेस ले धरमजीत सिंह प्रस्तावक बनिस हे।

संसदीय कार्यमंत्री रविन्द्र चौबे ह कहिन के बीजेपी ह अभु नेता प्रतिपक्ष तय नइ करे हे, त बीजेपी के जे तत्कालीन नेता हे उमन ल आग्रह करे गिस अउ उमन सहर्ष स्वीकार कर लिस। रमन सिंह महंत के प्रस्तावक बने हवय।  चौबे  ह कहिन के ए विधानसभा उच्च मापदंड स्थापित करही।

रविन्द्र चौबे ह कहिन के हिन्दुस्तान क सबले सुंदर राज्य छत्तीसगढ़ बने हे।  सदन म पूरा चरचा होही अउ  सबो विसय म बात करे जाही। उमन कहिन के उम्मीद हे के बीजेपी नेता प्रतिपक्ष के चुनाव जल्द कर लिही।

पूर्व मुख्यमंत्री के  प्रस्तावक बनना… ए मोर सउभाग्य

पूर्व मुख्यमंत्री मोर प्रस्तावक बनिल ए मोर सउभाग्य हे। नवनिर्वाचित विधानसभा अध्यक्ष डॉ चरणदास महंत  ह पत्रकारवार्ता म कहिन।  उमन आघू कहिन के  आज विधानसभा अध्यक्ष पद के चुनाव हवय, एमा  मोला  पक्ष अउ विपक्ष दूनों के समर्थन मिलिस।  मैं विधानसभा अध्यक्ष चुने गे हव।  उहें  पूर्व मुख्यमंत्री डॉक्टर रमन सिंह मोर प्रस्तावक बनिस ए मोर सउभाग्य हे ।