नवां सरकार बने के बाद ले पुराना मामला के फाइल खुलना सुरु …….एसआईटी करही टंगिया ग्रुप के नेता के मर्डर के जाँच

मामला म बड़े लोगन मन के खेलाफ एफआइआर दरज करे गे रहिस हे

जगदलपुर। छत्तीसगढ़ म नवां सरकार बने के बाद ले पुराना मामला के फाइल खुलत जात हे। झीरम कांड म एसआईटी बनाए जाए के बाद अब सुकमा म ग्रामीन सामनाथ बघेल के हत्या के मामला म बस्तर आईजी विवेकानंद सिन्हा ह जांच के बर एसआईटी के गठन करे हे। ए एसआईटी ल सुकमा डीएसपी लीड करही अउ एमा 6 सदस्य रहही। बता दन के सामनाथ बघेल के नवंबर 2016 म हत्या कर देय गिस। दरभा ब्लॉक के नामा गांव निवासी अउ नक्सल विरोधी टंगिया ग्रुप के लीडर सामनाथ बघेल के घर म घुसके नक्सली मन  ह हत्या कर देय रहिस हे। त उंखर  पत्नी  ह थाना म रिपोर्ट लिखाय रिहस हे।

पुलिस ह ए मामला म सामनाथ बघेल के पत्नी के सिकायत  म तोंगपाल थाना म  दिल्ली विश्वविद्यालय के प्रोफ़ेसर नंदिनी सुन्दर, जेएनयू के प्रोफ़ेसर अर्चना प्रसाद, सीपीएम नेता संजय पराते, विनीत तिवारी, मंजू कवासी अउ मंगलराम कर्मा के ख़ेलाफ़ 302, 120B, 147, 148, 149 ,452 अउ 25, 27 आर्म्स एक्ट के तहत अपराध दरज करे रहिस हे।

का हे टंगिया ग्रुप

आए दिन नक्सली मन के प्रताड़ना ले तंग आके नामा अउ सौतनार के तीन मोहल्ला  के युवक मन ह जनवरी 2016 म टंगिया ग्रुप के गठन करिस।  सामनाथ बघेल के नेतृत्व म युवक मन के टोली रात म टंगिया लेके गांव के चउकसी करे लगिस।  ए सिलसिला आज घलो जारी हवय। बेरा के संग ग्रामीन मन के मन ले नक्सली खउफ कम होत गेहे। ए बात नक्सली मन ल नागवार गुजरिस। नक्सली म ह बउखलाहट म 4 नवंबर 2016 के उमन दलम के मनोबल तोड़े बर घर म घुसके सामनाथ के नृशंस हत्या कर देय रहिस हे।

ग्रुप के मुखिया के हत्या के बाद दल के वरिष्ठ सदस्य हिड़मा कश्यप  ह बताइन के 2017 प्रथम 4 नवंबर के पुण्यतिथि म श्रद्धांजलि देय बर सामनाथ के स्मारक म सबो सदस्य जुटे रहिन। ए मउका म नक्सली मन ल उखाड़ फेंके के संकल्प लेय गे रहिस हे।  आज टंगिया दलम ह नक्सली मन ले लोहा लेवत हवय।