कांग्रेस के तीन महत्वपूर्ण बइठक होइस संपन्न ….. मीडिया पेनलिस्ट के सूची निरस्त

रायपुर। बुधवार के राष्ट्रीय प्रभारी सचिव द्वय चंदन यादव, अरूण उरांव के उपस्थिति म प्रदेस कांग्रेस कमेटी के तीन महत्वपूरन बइठक राजीव भवन रायपुर म संपन्न होइस।

 पहिली बइठक प्रदेश उपाध्यक्ष, महामंत्री अउ कार्यकारनी के  सदस्य मन के होइस। दूसर बइठक विस्तारित कार्यकारिनी के होइस।  जेमा उपाध्यक्ष, महामंत्री के अलावा संयुक्त महामंत्री, सचिव अउ संयुक्त सचिवगन सामिल होइन।उहें तीसर बइठक संचार विभाग के होइस। जेमा संचार विभाग के सदस्य, प्रवक्तागण, आई.टी. सेल अउ रिसर्च विभाग के सदस्य सामिल होइन।

ए तीन महत्वपूरन बइठक म आगामी लोकसभा चुनाव के तइयारी बर रननीति अउ कार्ययोजना बनाए गिस। प्रभारी सचिव चंदन यादव अउ अरूण उरांव  ह विधानसभा चुनाव के ऐतिहासिक जीत म पदाधिकारी मन ल बधाई देवत हुए कहिन के विधानसभा चुनाव सेमीफाईनल रहिस हे। अब हमन लोकसभा म छत्तीसगढ़ के 11 सीट जीतके देस म कांग्रेस के सरकार बनाए बर  जुटना हे।

संचार विभाग के बइठक म कांग्रेस  ह विधानसभा चुनाव म करे गे कार्य मन के विवरन  पुस्तिका सचिव द्वय ल सौपी अउ संचार विभाग म कसावट लाए  बर विचार-विमरस करे गिस।  बइठक म मुख्यमंत्री भूपेश बघेल के राजनीतिक सलाहकार विनोद वर्मा, मीडिया सलाहकार रूचिर गर्ग  ह अपन सुझाव व्यक्त दीन। संग ही अनुभव ले मार्गदरसन देवत रहे के बात कहीन। बइठक म पूर्व समन्वय समिति अउ संचार विभाग के बइठक मन के अनुरूप कांग्रेस मीडिया पेनलिस्ट के सूची ल निरस्त कर देय गेहे। उहें कांग्रेस संचार विभाग अउ प्रदेश कांग्रेस प्रवक्तागण यथावत कार्य करत रहही।