पेट्रोल पंप मन म लगे ए तख्ती उड़ावत  वाहन मालिक मन के होश

रायपुर। पेट्रोल-डीजल के दाम बेरा- बेरा म लोगन ल परेसान त करत हवय, अब पेट्रोल पंप मन म तेल कंपनी मन के ओर ले टांगे  गे एक सूचना ह घलो वाहन मालिक मन के होस उड़ावत हे।

तेल कंपनी मन म भारत पेट्रोलियम, इंडियन ऑयल और हिंदुस्तान पेट्रोलियम के ओर ले प्रदरसित सूचना म भारत सरकार के आदेस के हवाला देवत हुए बताय गेहे के सबो तेल कंपनी मन  पेट्रोल म ए दिन म दस फीसदी एथेलॉन मिला के पेट्रोल पंप मन ल भेजत हे।

एथेलॉन पानी, नमी अउ वाष्प के संपर्क म आए ले  पानी जइसे पदार्थ म बदल जाथे  जेखर ले  इंजन म रूकावट पइदा करथे। एखर बर उत्तरदायित्व पेट्रोल पंप के नइए।  सूचना म एथेलॉन मिलाए के हवाला देवत हुए वाहन मालिक मन ल बेर- बेरा म स्कूटर, मोटर सायकल अउ कार के पेट्रोल टैंक के सफाई कराए के  सलाह दे गेहे।