अमर ले अधिकारी- कर्मचारी मन नाराज… वाट्सअप म मैसेज

रायपुर। बिलासपुर विधायक अउ मंत्री अमर अग्रवाल के खिलाफ अधिकारी- कर्मचारी मन अपन नाराजगी जाहिर कर दीस। एक अधिकारी ह अमर के खिलाफ वाट्सअप म मैसेज पोस्ट करके बता दिस कि ओखर ले शासकीय सेवक मन म गहन नाराजगी हे। हालांकि बाद म ओ अधिकारी एपन सीनियर अधिकारी मन ले माफी मांगिस अउ ग्रुप ल छोड़ दिस। एती कलेक्टर पी दयानंद ह अइसे मैसेज मन ल ग्रुप म ना डाले के नसीहत दीस।
बिलासपुर के सरकारी अधिकारी मन म सरकार के खिलाफ नाराज़गी जगजाहिर होगे हे। जे वक्त इहां के जिला प्रशासन के अधिकारिक वाट्सअप ग्रुप म मौजूदा सरकार म मंत्री अमर अग्रवाल के खिलाफ एक अधिकारी ह मैसेज पोस्ट कर दिस।
बिलासपुर जिला प्रशासन के नाम म बने ये वाट्सग्रुप के मेंबर्स अउ एडमिन जिला प्रशासन के अधिकारी या कर्मचारी मन होथे। ये मैसेज के पोस्ट होय के बाद हड़कंप मच गेहे। अउ पोस्ट करइया मनखे ह ग्रुप ल छोड़ दिस। येखर बाद कलेक्टर पी दयानंद ह अइसे मैसेज मन ल ग्रुप म ना डाले के नसीहत दीस। उमन लिखिस कि ये मेसेज ल पोस्ट करइया कोन हे वो ला नइ जानव अउ अइसे मैसेज के उमन ल उम्मीद नइ रिहस हे। वइसे ये मैसेज के वायरल होत ही अधिकारी- कर्मचारी मन ह आपस म खुशी जाहिर करिस। अउ अमर ले अपन नाराजगी के खुलासा घलो करिस।
ये मैसेज ल पोस्ट करइया मनखे के कहिना हे कि गलती ले ये मैसेज उंखर ले पोस्ट होगे। उमन अधिकारी मन ले येखर बर माफी मांगे। धियान दे के बात हे कि जिला के वरिष्ठ अधिकारी ग्रुप के एडमिन हे।