कोंडागांव म मक्का प्रोसेसिंग प्लांट लगाए के प्रस्ताव ल सहमति दीस राहुल ह….भूपेस के संग भवानीपटना बर रवाना

जगदलपुर । कांग्रेस के राष्ट्रीय अध्यक्ष राहुल गांधी बुधवार  के जगदलपुर पहुंचिन। ए मउका म  उमन कोंडागांव म मक्का प्रोसेसिंग प्लांट लगाए के प्रस्ताव म सहमती दीस। बताय जात हे के,  राहुल जल्द ही एक कार्यक्रम म सामिल होय बर बस्तर आ सकत हे।  

जगदलपुर एयरपोर्ट म राहुल के मुख्यमंत्री भूपेश बघेल अउ मंत्री कवासी लखमा ह स्वागत करिन। ए मउका म राहुल ह कांग्रेस नेता मन ले मुलाकात करिन। जेखर बाद ले सेना के हेलीकॉप्टर ले सीएम भूपेश के संग ओडिशा के भवानीपटना बर रवाना होगिस।

कांग्रेस नेतामन ह लोहंडीगुड़ा म टाटा प्रभावित किसान मन ल पट्टा वितरन बर राहुल ल आमंत्रित करे हे। जेखर बर राहुल के हामी भरे के बात कहे जात हे। राहुल  ह मउका म  मक्का प्रोसेसिंग प्लांट लगाए के ऐलान कर सकत हे।

कोंडागांव के विधायक मोहन मरकाम ह राहुल गांधी के आघू अपन विधानसभा क्षेत्र म मक्का प्रोसेसिंग प्लांट लगाए के प्रस्ताव रखिस। जेला राहुल ह सहमति दे दीस। राहुल ह कहिन के, बस्तर म उद्योग ल बढ़ावा देवत हुए स्थानीय लोगन ल रोजगार उपलब्ध कराए जाही।