बजट सत्र ..बीजेपी विधायक के ए सवाल म मचग बवाल

रायपुर । बजट सत्र के तीसर दिन घलो सदन म जोरदार हंगामा होइस। गृहमंत्री ताम्रध्वज साहू ले राज्य म कानून बेवस्था ल लेके सवाल पूछे गस। ए मामला म हंगामा ल लेके सभापति के ओर ले हस्तक्षेप करे के बाद विपक्ष ह जोरदार विरोध दर्ज कराइस।

दरअसल, ध्यानाकर्षन काल के दउरान पूर्व मंत्री अउ बीजेपी विधायक बृजमोहन अग्रवाल ह गृहमंत्री ले सवाल पूछिस, पूरा प्रदेस म कानून के स्थिति का हे, कतनी मर्डर अउ लूट के घटना मन होइस हे।

एमा गृहमंत्री ताम्रध्वज साहू ह कहिन, सबो क्राइम के घटना मन ल कंट्रोल करे के काम होवत हे। शासन के प्रति आम जनता के विश्वास बने हुए हे। लोगन मन म कोनो प्रकार के रोष व्याप्त नइए।

विपक्ष के ए सवाल म आसंदी सभापति ह आपत्ति जताइस। एखर बाद विपक्ष ह आसंदी सभापति सत्यनारायण शर्मा उपर सत्ता पक्ष के सदस्य मन ल संरक्षन देय के आरोप लगात हुए सदन म हंगामा सुरू कर दिस। हंगामा के बीच विपक्ष के सदस्य बृजमोहन अग्रवाल अउ अजय चंद्राकर ह कहिन, अब हमन कोनो प्रश्न नइ पूछन।