भूपेश सरकार के फइसला ले खुश हवय कर्मा परिवार… का कहिन जानव

रायपुर. भूपेश सरकार के लेगे फइसला ले स्वर्गीय महेन्द्र कर्मा के
परिवार बेहद खुस हवय. उमन ए फइसला ल दिवंगत महेन्द्र कर्मा के प्रति
कांग्रेस सरकार के ओर ले देगे सच्ची श्रद्धांजलि बताइन. दरअसल बात
महेन्द्र कर्मा के छोटे बेटा आशीष कर्मा ल डिप्टी कलेक्टर नियुक्त करे
गेहे. भूपेश सरकार ह आशीष कर्मा ल डिप्टी कलेक्टर बनाए कैबिनेट म मंजूरी
दे दीस.

एमा खुशी जाहिर करत हुए स्वर्गीय महेन्द्र कर्मा के पत्नी अउ आशीष के मां
देवती कर्मा ह कहिन, हमन कतको बेर पूर्व सरकार के समक्ष आवेदन करे रेहेन.
काबर तत्कालीन रमन सरकार ह झीरम घाटी म मारेगे नेता मन परिवार मन के मदद
के बात कहे रहिस हे. ए सिरिफ वादा ही रहिगे. अब भूपेश सरकार ह हमार मांग
ल पूरा करत हुए आशीष ल डिप्टी कलेक्टर बनाए हे. एहम सब मन बर गर्व के
संग भावुक कर देवइया पल हे. ए फइसला बर सरकार के बहुत-बहुत आभार.

आशीष के भाई छविन्द्र ह कहिन, मुख्यमंत्री भूपेश बघेल के संवेदनशीलता हवय
के हमन उंखर तीर ए कहना घलो नइ पड़िस के, परिवार के मदद करना हे या फेर
पूर्व सरकार के समक्ष करेगे आवेदन म फइसला लेना हे. भूपेश सरकार जे निरनय
ले हे, ओखर हम सब मन दिल ले स्वागत करत हन. आशीष घलो बेहद खुस हवय. काबर
के वो यूपीएससी के तइयारी करत रहिस हे. जब झीरमघाटी म हमला होइस.