बिदाई के बेरा म याद आवत हे लोकपाल अऊ चौकीदारी: शैलेष

रायपुर. “मैं भी हूं चौकीदार” अभियान उपर तीखा हमला करत प्रदेश कांग्रेस के महामंत्री अऊ संचार विभाग के अध्यक्ष शैलेश नितिन त्रिवेदी ह कहिन कि सत्ता बर गजब के चुनावी बुखार हे। तड़ीपार घलो लिखत हे वहू चौकीदार। बिदाई के बेरा म भाजपा ल लोकपाल अऊ चौकीदार के भूमिका याद आ गे हे।

ओमन कहिन कि देश म एक संवैधानिक चौकीदार लोकपाल के नियुक्ति के आवाज उठे रिहिन, ऐखर नियुक्ति ल लेके सरकार म आए के बाद मोदी अऊ भाजपा ह प्रोपगेंडा करिस। पांच साल निकल गे अब जब आचार संहिता लग गे हे तब लोकपाल के नियुक्ति करे के कवायद शुरू हो गे। जम्मो चोर खुद ल चौकीदार बताए के स्वांग रचत हे। मैं भी हूं अन्ना के तर्ज म मैं भी हूं चौकीदार अभियान छेड़े के जेन कोशिश होत हे ओ ह अन्ना अभियान के बदसूरत नकल हे।

शैलेष नितिन त्रिवेदी ह कहिन के सच्चाई त ए हे कि 2013 म कांग्रेस सरकार ह लोकपाल अऊ लोकायुक्त विधेयक ल प्रस्तुत करे रिहिस। जेखर धार 63 के तहत एक साल के भीतर लोकपाल नियुक्त करे के प्रावधान रिहिस। विधेयक ह 16 जनवरी 2014 म लागू होए रिहिस। आज 5 साल हो गे मोदी जी ह चोर मन के भागीदार अऊ भ्रष्टाचारी मन के संरक्षक बने रिहिस अब बिदाई के बेरा म चौकीदार कहवाए बर लाईन म खड़े हो गे हे।