स्टिंग ऑपरेशन के वीडियो ल सार्वजनिक कर दिस फिरोज

अंतागढ़ टेपकांड मामला : वीडियो रिकॉर्डिंग अउ रिकॉर्डिंग उपकरन सउपिस एसआईटी ल
रायपुर. अंतागढ़ टेपकांड मामला म सोमवार के प्रमुख गवाह फिरोज सिद्दिकी एसआईटी के आघू पेश होइस. फिरोज सिद्दिकी ह पुनीत गुप्ता के संग होय बातचीत के वीडियो रिकॉर्डिंग अउ रिकॉर्डिंग उपकरन एसआईटी ल सउपिस हे.

फिरोज ह पुनीत गुप्ता के जे स्टिंग ऑपरेशन करे रिहिस हे. वो स्टिंग ऑपरेशन के वीडियो ल सार्वजनिक कर दिस हे. वीडियो के सार्वजनिक होय ले सूबे म एक बार फेर ले बड़े राजनीतिक तूफान खड़ा हो सकत हे. जे वीडियो के चर्चा छत्तीसगढ़ ले लेके दिल्ली तक होवत रिहिस.

ये वीडियो म पुनीत गुप्ता अउ फिरोज सिद्दिकी बातचीत करत नजर आवत हे. पहिली बेर ये वीडियो आघू आय हे. फिरोज सिद्दिकी ह मीडिया ले बात करत हुए पूर्व मुख्यमंत्री रमन सिंह के दामाद पुनीत गुप्ता ह पाछू सरकार के नाम म धमकाए के आरोप लगाइस हे. फिरोज सिद्दकी ह खुलासा करिस हे कि बातचीत म पुनीत गुप्ता ह मंतूराम पवार ल लालबत्ती देय के बात कहे रिहिस हे.