हरिहर छत्तीसगढ़ के सपना ह होही सकार, नदिया-नरवा के पार म लगाए जाही पउधा

रायपुर। हरियर छत्तीसगढ़ अभियान म ये बछर राज्य म 7 करोड़ 13 लाख पउधा लगाए के लक्क्ष रखे गे हे। राज्य के प्रमुख 5 पांच नदियां इन्द्रावती, अरपा, खारून, शिवनाथ अउ सकरी नदी के पार म 633 हेक्टेयर क्षेत्र म 7 लाख 38 हजार 826 पउधे लगाए जाही, ऐमा फलदार पउधा लगाए बर जादा प्राथमिकता दे जाही। ऐखर संग ही राज्य म 594 नदिया-नरवा के किनारे म लगभग 23 हजार हेक्टेयर क्षेत्र म पउधा लगाए जाही। हमर राज्य के प्रमुख अउ बड़े तकनीकी शिक्षण संस्था आईआईएम, आईआईआईटी, चिकित्सा महाविद्यालय कैम्पस बस्तर, चिकित्सा महाविद्यालय राजनांदगांव, जंगल सफारी अउ सब्बो नगरीय निकाय मन के प्रमुख बाग-बगीचा म घलो पउधा लगाही। मुख्यमंत्री भूपेश बघेल के अध्यक्षता म गुरूवार के मंत्रालय म होइस हरियर छत्तीसगढ़ पउधारोपण कार्यक्रम के बइठक म ये जानकारी दे गिस। मुख्यमंत्री ह निरदेश दिस कि पउधारोपण बर अइसे जगह ल चुनहू, जिहां पउधा ल बढे बर बढ़िया वातावरण मिलय। पउधा लगाए के बाद पउधा जिंदा राहय अउ ओ ह बाढ़त हे की नई ऐखर निगरानी घलो करहू। मुख्यमंत्री ह सहर अउ ग्रामीण दूनो इलाका म फलदार पउधा लगाए बर जोर दिस। वो ह औद्योगिक संस्थान ल घलो हरियर छत्तीसगढ़ अभियान म अपन भागीदारी निभाए के आग्रह करिन हे।

मुख्यमंत्री ह निर्माणाधीन आवासीय कालोनी में घलो अनिवार्य रूप ले पउधा लगाए अउ पानी के संरक्षण के काम करे बर जोर दिस। अइसने ही राज्य म जेन गोठान बनाए जात हे ओमा विशेष रूप ले फलदार पउधा लगाए के निरदेश दिन। वो हर गुरूर अउ धरसींवा विकासखण्ड म विशेष रूप ले पानी के स्तर ल बढ़ाय म सहायक पउधा लगाए के निरदेश दिस।

वन विभाग के अपर मुख्य सचिव आर. पी. मण्डल ह बतइस कि पउधारोपण मुख्य रूप ले वन विभाग, वन विकास निगम अउ पंचायत व ग्रामीण विकास विभाग ह करही। आने विभाग ल घलो पउधारोपण बर पउधा दिही।

बइठक म वन मंत्री मोहम्मद अकबर, मुख्य सचिव सुनील कुमार कुजूर, एनएमडीसी के सीएमडी एन बैजेन्द्र कुमार, विशेष सचिव उद्योग अलरमेल मंगई डी संग भिलाई स्टील प्लांट, एनटीपीसी, एसईसीएल, बालको, जायसवाल निक्को, एसकेएस पावर, जिंदल स्टील एन्ड पावर, बंजरंग पावर एन्ड इस्पात, राजस्थान राज्य विद्युत उत्पादन निगम लिमिटेड, सारडा एनर्जी एन्ड मिनिरल्स, गोदावारी पावर एन्ड इस्पात कंपनी मन के प्रतिनिधि अउ वन विभाग के वरिष्ठ अधिकारी मन आए रिहिन।