छात्र मन के भविष्य भगवान भरोसे… 9 साल हो गे फेर नई हो पाइस शिक्षक के बेवस्था.. छात्र मन करिन कलेक्ट्रेट के घेराव

रायगढ़.  जिला के तमनार विकासखण्ड के महलोई गांव के हायर सेकंडरी स्कूल म विद्यार्थी मन ल पढ़ाए बर शिक्षक मन के कमी हे। पालक अउ छात्र-छात्रा मन ह कई बार हो गे ये समस्या ले शासन-प्रसासन अउ शिक्षा विभाग ल अवगत करावत, फेर उंकर समस्या के समाधान नई होईस हे। एखर ले नाराज छात्र-छात्रा अउ ओखर अभिभावक मन ह शिक्षक के बेवस्था करे के मांग ल लेके सोमवार के कलेक्ट्रेट के घेराव कर जोरदार प्रदर्शन करिस अउ अधिकारी मन ल अपन मांग के संबंध म ज्ञापन सौंपिन हे।

बतात हन कि जिले के तमनार विकासखण्ड के गांव महलोई म हायर सेकेंडरी स्कूल के उन्नयन साल  2011 में कर दे रहिस, फेर 9 साल बाद भी इहां के छात्र-छात्रा मन ल पढ़ाए बर एक शिक्षक के भी बेवस्था जिला शिक्षा विभाग ह कराए म नाकाम साबित हो गे।  शिक्षक के बेवस्था करे बर कई बार अधिकारी मन ल ज्ञापन सौंपे गिस, फेर कुछ नई होईस। एखर ले नाराज स्कूली विद्यार्थी अउ ओखर अभिभावक द्वारा जिला कलेक्ट्रेट के घेराव करत जिला शिक्षा विभाग के खिलाफ जमकर नारेबाजी करिन। उंहे जिला प्रशासन को ज्ञापन सौप के शिक्षक के कमी के समस्या ले अवगत करावत समाधान करे के मांग करिस हे, अउ जल्दी बेवस्था नई करे के स्थिति म छात्र अउ अभिभावक मन ह स्कूल ल बंद करे क बात करत रिहिन हे।