खड़ेच फसल भर के न ही, अब लुआय फसल के घलो नुकसानी दीही बीमा कंपनी, नवा योजना जम्मो जिला म लागू

रायपुर। छत्तीसगढ़ म खरीफ अउ रबी फसल मन बर प्रधानमंत्री फसल बीमा योजना प्रदेस के सबो जिला म लागू कर दे गे हे। योजना म किसान मन ला बीमा कव्हरेज के अंतर्गत खड़े फसल म बुवाई ले लेके फसल के कटाई तक अउ ओकर बाद होने वाला नुकसान ला घलो सामिल करे गे हे।
योजना म किसान मन ला कम बर्षा या प्रतिकूल प्राकृतिक परिस्थिति के कारण बोवाई नई होए घलो बीमा के लाभ मिलही। इही प्रकार ले फसल कटई के बाद खेत म सुखाए बर छोड़े गे फसल के क्षति होए म घलो किसान मन ला बीमा के लाभ मिलही। किसान मन ला खड़े फसल म सूखा, बाढ़, कीट व्याधि, आगी अउ कोनो भी प्राकृतिक कारण ले होवया नुकसान ला घलो बीमा म सामिल करे गे हे।
योजना बर अधिसूचित खरीफ फसल मन म सिंचित अउ असिंचित मक्का, सोयाबीन, मूंगफल्ली, तुअर (अरहर), मूंग अउ उड़द ला सामिल करे गे हे। इही प्रकार ले रबी फसल के अंतर्गत सिंचित अउ असिंचित गेहूं, राई, सरसों, अरसी ला सामिल करे गे हे। फसल के रकबा 10 हेक्टेयर या ओकर ले ज्यादा होही त संबंधित बीमा इकाई म अधिसूचित करे जाही। बीमा योजना म ऋणी किसान अउ गैर ऋणी किसान सामिल हो सकथें।