कबीर पंथ ह करिन हे स्कूल म अंडा दे के विरोध, सौंपिन हे मुख्यमंत्री के नाम ज्ञापन

कवर्धा संजू गुप्ता. कबीर पंथ ल मनइया मन ह स्कूल म मध्यान्ह भोजन म लइका मन ल अंडा खवाय के विरोध करत हे। गुरूवार के कबीर पंथ के लोगन मन ह सहर म रैली निकालिन। इही दउरान कलेक्टर कार्यालय के घेराव कर स्कूल म अंडा वितरण करे के विरोध करत प्रसासन के खिलाफ जमके नारेबाजी करिस अउ मुख्यमंत्री के नाम ज्ञापन सौंपिन हे। संग म ये मांग करिन कि स्कूल मन म तत्काल अंडा वितरण ल बंद करे जाए।

कबीर पंथी लोगन मन के ये मानना हे कि अंडा ह मांसाहारी हरे जेखर कारण येला स्कूल म देना बंद करय, काबर कि ये ह न्याय संगत नई हे। स्कूल म मध्यान्ह भोजन म हप्ता म एक दिन अंडा देवत हे तेला तत्काल बंद करय,  अगर सासन- प्रसासन ह येला बंद नई करही त चक्का जाम करके आंदोलन करे जाही। भाजपा के शासन काल म घलो अंडा देवत रहिन वो समय घलो विरोध करे गे रिहिस, जेला वो समय के भाजपा सरकार ह अपन फैइसला ल बदल दे रिहिस।

जिला अध्यक्ष ईश्वरी साहू अउ खिलेश्वरी साहू के कहिना हे कि अंडा मांसाहारी हरे, ये धर्म शास्त्र म ये भी माने गे हे कि अंडा ह मांसाहारी हरे, जेखर कबीर पंथी ह विरोध करत हे अउ अगर मेनू ले अंडा ल नई हटाही त चक्का जाम करे जाही।

उंहे भाजयुमो के प्रदेश अध्यक्ष विजय शर्मा के कहिना हे कि स्कूल म लइका मन ल अंडा खवाय के सरकार के फरमान ह गलत हे। आज-कल अतेक बडे पैमाना म अंडा मिलत हे जेकर उत्पादन इंजेक्शन द्वारा करे जाथे। सरकार ह ये बात ल नई मानही त कबीर पंथ के धर्म गुरू प्रकाश मुनि साहेब ह घलोक दामाखेडा म राष्ट्रीय राजमार्ग म चक्का जाम करही ताहन 2-4 घंटा म सरकार ह घुटना टेक दिही।