जीजा घर बहिनी के सेवा बर आए रिहिस साली, पहुना बनके आए छोकरा ह ले के भगा गे
महासमुंद। रथयात्रा देखे बर सगा बनके आए रिहिस एक लड़का ह नाबालिग लड़की ला लेके भगा हे। ए मामला हरे महासमुंद जिला के तेंदूकोना क्षेत्र जिहां अपन जीजा घर आए साढ़े 15 साल के लड़की के अपहरण के मामला पुलिस म दर्ज कराए गे हे।
घटना 10 जुलाई के रात साढ़े दस बजे के बताए गे हे। लड़की के जीजा हा पुलिस म रिपोर्ट लिखाए हे कि ओकर नाबालिग साली ला संदेही उग्रसेन बाघ हा बहला फुसला के भगा के ले गे हे। लड़की के जीजा हा पुलिस ला बताए हे कि ओकर पत्नी के डिलवरी होवईया हे एखर सती ओखर साली हा 2 जुलाई के खाना बनाए बर आए रिहिस। इही बीच 10 जुलाई बुधवार के दिन उंकर गांव म रथयात्रा के तिहार रिहिस।
रथयात्रा देखे बर रिस्ता म ओकर साला हा अपन दोस्त उग्रसेन बाघ संग आईस जेन हे सुखीपाली शांतिनगर के रहवईया आए। संझा करीब 6 बजे अपन घर जावत हंन कहिके चले गें। फेर रात साढ़े दस बजे जब घरवाला मन नींद ले जागिन त लड़की हा घर ले लापता रिहिस। संका जताए जात हे कि उग्रसेन हा लड़की ला बहला फुसला के भगा ले गे हे। पुलिस हा धारा 363 के तहत अपराध पंजीबद्ध करके जांच करत हे।
